«Ухаан бодолой урилдаан «Таагты!» гэhэн можонууд хоорондын наадан октябриин 10-да Ага тосхоной соёлой байшан соо эмхидхэгдэбэ.
Энэ наадан Агын Буряадай тойрог дотор соносхогдоhон Буряад хэлэнэй hарын хэмжээндэ анха түрүүшынхеэ үнгэргэгдөө. Бүхыдөө арбан можын таба-табан түлөөлэгшэд ухаан бодолой урилдаанда хаба шадалаа туршаа.
Үбэр Байгалай хизаарай буряад соёл хүгжөөлгын түбэй мэргэжэлтэд Буряад хэлэнэй hарын хэмжээндэ кроссворднуудай суглуулбари хэблэhэн байна. Кроссворднуудай автор – Могойтын аймагай Сагаан-Уула нютагай багшын ажалай ветеран, Ород Уласай арадай гэгээрэлэй эрхим Будажаб Цыбегмитов. Будажаб Доржиевичай кроссворд бүхэн өөр өөрын тусхай темэтэй, тэдэнииень таажа, Агын тойрогой түүхэтэй, алдар солото газарнуудтайнь, хүнүүдтэйнь, амитад ургамалнуудтайнь, буряад арадай ёhо заншалнуудтай танилсахаар юм. Суглуулбари соо буряад хэлэн дээрэ зохёогдоhон 41 кроссворд ороо бшуу.
Урилдаанда хабаадагшад Россин Баатар Бадма Жабондо, табан хушуун малда, Агын тойрогой хүндэтэ эрхэтэдтэ, ёhо заншалда зорюулагдаhан кроссворднуудые үгтэhэн сагай хугасаада тааhан байна.
Жюрин гэшүүд.
Эсэстэнь манай номой сангай мэргэжэлтэдhээ бүридэhэн «Улаалзай» можо хүндэтэй 3-дахи hуури эзэлээ.
«Улаалзай» можо.
Хоёрдохи hуурида Агада, Шэтэдэ ажаhуудаг эдэбхитэй эрхэтэдые суглуулhан «Шог ёгто» гэhэн можо гараа.
«Шог ёгто» можо.
Шэтын ГТРК-гай Агын таhагай сэсэ мэргэн сэтгүүлшэдэй табиhан «Ага хэлэнэ» можо түрүүлбэ.
«Ага хэлэнэ» можо.
Тиихэдэ Могойто ба Ага тосхонгуудhаа, Будалан, Хүнхэр, Хойто-Ага, Һүдэнтэ hуурингуудhаа бууhан, Агын аймагай соелой байшан түлөөлhэн эдэбхитэдтэ хабаадагшын үнэмшэлгэнүүд болон кроссворднуудай суглуулбари барюулагдаа.
Дарима Базарова,
Ц. Жамцараногой нэр. Агын хизаарай номой сангай
мэдээсэлэй таhагай ахамад библиотекарь.
