Эхын үдэр угтуулан, ноябриин 25-да Ц.Жамцараногой нэрэмжэтэ Агын хизаарай номой сан соо эжы тухай шүлэг уншалгаар мүрысөөн эмхидхэгдээ.
Манай гүрэн дотор тэмдэглэгдэдэг олон тоото hайндэрнүүдэй дунда Эхын үдэр онсо hуури эзэлдэг гээшэ. Юундэб гэхэдэ, энэ hайндэр бүхы зондо хабаатай, эгээл энэ үдэр бүхы Эжынэртэ баярай үгэнүүдые хэлэмээр. «Эхэ» гэhэн богонихон үгэ соо энхэрэл, дуран, зүрхэ сэдьхэлэй урин ульhан, амгалан тэнюун байдал – булта багтанхай. Эжын гэртээ байхада, гэр соо hаруул, дулаан байдаг ха юм, сэдьхэл тэнюун боложо, ямаршье бэрхэшээлнүүд дары дабагдадаг, асуудал бүхэндэ харюу олдодог гээшэ.
Мүрысөөндэ hургуулиин урда тээхи наhанай болон эхин шатын hургуулиин үхибүүд хабаадаа. Уранаар шүлэг уншалгын зорилго хадаа балшар багахан үхибүүдэй буряад хэлэ хүгжөөлгэ, тэдэнэй анхарал буряад уран зохёол уншалгада хандуулга байба. Мүрысөөн «Бэлиг» гэhэн буряад хэлэн дээрэ харилсалгын түлэбэй шугамаар эмхидхэгдээ юм. Энэ түлэб Үбэр-Байгалай хизаарай Соёлой яаманай грантда хүртэhэн, хабаадагша бүхэн гарай бэлэгээр болон хабаадагшын баталамжаар урмашуулагдаа.
Бүхыдөө буряадайнгаа үндэhэн хубсаhа үмдэhэн, согтой, эдэбхитэй 13 багашуул хабаадаа, тэрэ тоодо эхин шатын hургуулиин шабинар болон хүүгэдэй сэсэрлигэй хүмүүжэмэл Амина Доржиева. Жюриин гэшүүдэй дүнгүүдые тататар, Ц.Жамцараногой нэрэмжэтэ Агын хизаарай номой сангай хүүгэдэй таhагай библиотекарь Арюна Лодонова асуудал-харюугай hонин наадануудые хабаадагшадтай эмхидхээ.
Мүрысөөнэй дүнгүүдээр, 1-дэхи hуури Агын 3-дахи дунда hургуулиин 2-дохи ангиин hурагша Дарина Тунгаланова эзэлээ, Агын 1-дэхи дунда hургуулиин 4-дэхи «Фаворит» ангиин hурагша Сарюна Батоева хоёрдохи болоо, харин шангай гурбадахи hуурида Агын 1-дэхи дунда hургуулиин 2-дохи «Жаргал» ангиин hурагша Баин Цыбенов хүртэhэн байна. Шалгарhан эдэ үхибүүдтэ номой сангай захирал Дарима Дарижапова тусхай шангуудые хүндэлэлэй грамотануудтайгаар барюулаа.
Д.Д.Базарова, Цыбен Жамцараногой нэрэмжэтэ Агын хизаарай номой сангай
мэдээсэлэй таhагай ахамад мэргэжэлтэн
