- Ямар хүнтэй үгэ нэгэдэхэеэ урид hайнаар хара, үгэеэ сэгнэ, олон табые бү шаша.
- Сээжынгээ оёорой hанаан бодолые түлхюур мэтээр хадагала.
- Олон зон соо үгэеэ шэнжэжэ дуугара, гансаараа ябахадаа, сэдьхэлээ шэнжэхэ юумэ.
- Миниихи зүб гэжэ бардамлаа hаа, мунхаг тэнэгтэ тоологдохош.
- Хахасашагүй нүхэрөө марташагүй үгөөр бү гомодхоогоорой.
- Түлеэ гэртэ оруулаад, шангаар дээрэhээ хаяжа болохогүй. Гэрэй заяаша, галай заяаша, үүдэн тэнгэриие залд гүүлэхэш. Эдэ заяашадые гомодхоогоо hаа, өөдэлхэгүйш.
- Үүдэн тэнгэри, гал гуламтаяа тахюулжа байха хэрэгтэй.
- Бузартай, муухай юумэ уhанда оруулжа болохогүй, лусад сабдаг хорлохо.
- Хуримтай ба нүүдэлтэй харгы замда уулзанхаар, хүниие хүдөөлүүлжэ ябаhан зонтой уулзаhан дээрэ гэдэг.
- Элүүр хүн хэбтээд эдеэлхэгүй – үбшэ зоболон зүгнэхэ.
- Галай үнэhэ худхажа, улаан согыень шангаар сохихогүй, галай заяаша зобохо юм гэдэг.
- Һүни орой хюмhаа абахагүй, шэхэнэй хулхи малтахагүй (хүнэй hүнэhэн hүни хюмhан доро, шэхэн соо хоргодоод байдаг).
- Айлшаниие хүндэлхэдөө – өөрыгөө хүндэлнэш, хүндэ туhа хэхэдээ, хүн үгырдэггүй.
- Хүүгэдэй шэхэ арайш мушха, бү дайра – үхибүүнэй сахюусан шэхэндэ байрладаг. Тиимэhээ сахюусанииень гомодхоохош, сошоохош.
- Уhа абаад ябаhан хүнэй урдуур бү гара, урдуураа гарга. Хооһон амһартатай ябаһан хүнэй урдуур үрдижэ гара. Һайн үзэгдэл гээшэ.
- Үри хүүгэдэйнгээ, эжы абынгаа хажууда хэрүүл ама, хэрэлдээ шууяа бү хэгты. Хүндэлхөө болихо, үгэтнай үнэгүй болохо. Хүүгэдтнай үгэ дуулажа үгэхэеэ болихо, зүрюу, хирзагар зантай болошохо.
- Захирган, дээрэлхүү зан бү гаргагты. Зөөлэн аад, сэсэн хурса үгэтэй, энеэбхилһэн һайхан шарайтай һаа, хүндэ хүндэтэй ябахат.
- Уруу дуруу, муу, юумэ гү, али хүниие шарайшалжа бү яба. Үнгэрһэн үйлэ хэрэг огто бү нэхэ. Хүнүүдые бү муушала, хүнэй мууе бэедээ бү няа.
- Ажал хүдэлмэри хэхэдээ, нарин нягтаар, урин зантайгаар хэ. Уур сухал боложо, энэ тэрэ юумэеэ бү шэдэгты, хожом хүүгэдтнай һажааха.
- Атаа жүтөөндэ абтангүй, эрдэмээ дээшэлүүлхэеэ оролдогты.
- Эдеэ хоол һайнаар буйлуулжа, амтатайгаар шанажа, гэртэхинээ, хүүгэдээ хооллуулагты.
Цыремжит Батоевагай суглуулбариhаа.
