Намартаа үүр хираалга илангаяа гое байдаг. Алтан шара набшаhанай наранай алтан шара туягаар хушагдахада, бүхы оршон тойронхи алтан шара болоhон мэтэ үзэгдэдэг.
Нохой hарада модод алтан шара набшаа унагааха. Намарай дунда hара болоно, hүниндөө уhан хүрэжэ эхилхэ, hүүдэр талын газар хүрэжэ захалха.
Арад зоной хэлэдэгээр, ургаса ногоон, ургаhан модон оройhоо эхилжэ хагдарбал, шэмэеэ газарта шэнгээдэг, энэнь бэлшээриин адууhа малда ехэ туhатай бшуу.
Намарай хүйтэн бороо ехээр ороо hаа, үбэлдөө саhа багатай байха гэхэ.
Похрообто (Покров Пресвятой Богородицы) – октябриин 14-дэ газар хүрэдэг. Таряа хуряалга дүүрэхэ. Зон үбhэ хулhаа үбэлжөөнэйнгөө хорёо хуhамагта шэрэжэ оруулха.
Намарай саг буряад зондо шухала сагай үе. Намар бүхэндэ гэрэй амитадай нэрэнүүд hэлгэгдэдэг гээшэ. Жэшээнь, хурьган ябаhан хониной түл түлгэ болодог, саашадаа жэл жэлээр hэлгэн, зуhаг, эрэнь хизаалан, эмэнь hагли болохо. Дүрбэдэхи жэлдээ бүдуүн хонин, эрэнь эрье, хуса болодог гээшэ.
Саhанай үгы hаа, мал бэлшээридэ таргалха. Хүн зон түрэ хурим үнгэргэхэ. Малдаа үбhэ үгэжэ, халуулжа эхилхэ. Үбэлэй хүйтэниие дабажа гараха ажалнуудаа хүсэд хэжэ, хүн зон ан-бун үбэлые угтаха бэлэн байдаг.
Цыремжит Батоевагай суглуулбариhаа.
