Түрүүшын багша — намтарайм эхин,
Түрэhэн эхэтэйм адли hанагдадаг.
Ажалай дабаа гаталхадаа ахин,
Ашата багшын hургаал дурдагдадаг…… Газарта, эрдэмдэ, ажалда дурлуулан,
«Гарыень ганзагада, хүлыень дүрөөдэ» хүргэлсэн
Багша нэрээ алдаршуулан суурханат,
Баглаа сэсэг баясан тогтоонот…/Цокто Номтоев/
Октябриин 5-да Багшын үдэр тэмдэглэгдэдэг гээшэ. Энэ hайндэртэ зорюулан, «Багшын hургаал – оёоргүй тунгалаг булаг!» гэhэн номой ʏзэсхэлэн Цыбен Жамцараногой нэрэмжэтэ Агын номой сангай хизаар ороноо шэнжэлэлгын таhагта зохеогдонхой. Багшын hургаал оёоргүй тунгалаг гэжэ тон зүб хэлэгдэнэ. Багашуулые бүгэдэ юумэндэ hургаха, хүмүүжүүлхэ гэhэн зорилготой манай багшанар hурагшадайнгаа хаба шадал соонь эрдэм номдо hургахаhаа гадна, дүрбэн тэгшээр хүмүүжүүлнэ, ажалда дурлуулна, ухаан бодолыень хүгжөөнэ — эхэ эсэгэтэйнь адлил үүргэ дүүргэдэг ха юм. Тиимэhээ бидэ маанадые хүн болголсоhон, зүб харгыемнай ололсоhон багшанартаа доро дохин, бултыетнай Багшын үдэрөөр хани халуунаар амаршалнабди, ехэ амжалтануудые, элүүр энхые хүсэнэбди.
Тус номой үзэсхэлэндэ багшын ажал тухай, мүн багшанарай өөhэдынь олон статьянуудтай, методическа заабаринуудтай, hанамжа болоод дурадхалнуудтай номуудые дурадханабди. Багша тухай ульгам зохидхон шүлэгүүд олоной анхаралда табигдаа: Арсалан Жамбалоной «Жамьян багшадаа», Батожаргал Гармажаповай «Багшадаа», Дугарма Батоболотовагай «Багшадаа дохиноб», Цыжидма Базаржаповагай «Түрүүшын багша».
Yзэсхэлэндэмнай мүн лэ тойрогой hургуулинуудай ойн баярта зорюулагдаhан номуудтай танилсахаар. Хүндэтэ уншагшад! Манай номой сан ерэжэ, хизаар ороноо шэнжэлэлгын таhагта зохеожо табиhан энэ номой үзэсхэлэнтэй танилсахыетнай уринабди!
Батомункуева Р.М.,
Цыбен Жамцараногой нэрэмжэтэ номой сангай
хизаар ороноо шэнжэлэлгын таhагые даагша
