- Хоёртой-гурбатайдаа хэлэндэ ороhон үхибүүн томо болоходоо, сэсэн ухаатай хүн болохо гэдэг.
- Хоёртой-гурбатайдаа хүлдэ ороhон үхибүүн томо болоходоо, даруу номгон зантай, гэр болон нютаг тойрондоо ажаhууха.
- Халтад гэхэдэ бархирдаг, уйладаг үхибүүн томо болоходоо, эльгэ нимгэн, хүн зониие, түрэлхидөө, эхэ эсэгэеэ хайрладаг, дүмэдэг хүн болоод, зондо туhатай ябаха.
- Гуталаа буруу үмдэдэг хүүгэд томо болоходоо, басаган hаа — оло дахин хадамда гараха, хүбүүн hаа — оло дахин hамга абаха гэхэ аабза.
- Нарай үхибүүнэй зулайн нүхэн бага байгаа hаа, боро, бархирдаггүй, шэрхихэн хүүгэд гээшэ гэхэ. Зулайнь нүхэн ангагар ехэ hаа, борохон бэшэ, энэ тэрэ юумэндэ диилдэдэг үхибүүн гэжэ мэдэхэ хэрэгтэй.
- Нэгэ жэлтэй болоодүй аад, түргөөр ябадаг болоhон үхибүүн томо болоходоо, шуран шударгы ба холын газарнуудые үзэхэ, гэрhээ холо газарта ажаллаха хүн болохо.
- Үенhөө эртэ хэлэндэ ороhон үхибүүн томо болоходоо, шуран шударгы, улаан хэлэн байнал гэжэ хүниие зүршэн (возражение) дуугардаг хүн болохо гэдэг.
- Гэртээ болон газаа үхибүүдые суглуулаад, үгөө дуулгажа, наада эмхидхэдэг үхибүүн томо болоходоо, али нэгэн ажал хүдэлмэриин хүтэлбэрилэгшэ гү, али багша болодог.
- Үхибүүдтэ бэлэгээ бултыень тараагаад, өөртөө юушье үлөөдэггүй үхибүүн томо болоходоо, олон нүхэдтэй, тэдэнэртээ туhалхал гэжэ ябадаг хүн болодог.
- Нааданхайнуудаа суглуулжа, хадагалдаггүй үхибүүн томо болоходоо, зөөри барижа шадахагүй, hалан хүн болодог. Мүнгэтэй болоошье hаа, тэрэнээ зөөри болгожо шадахагүй.
- Үхибүүдтэй наадажа байхадаа, бирагүйхэн юумэнhөө сухалдаад, эрхээд, гэртээ ерэдэг үхибүүн томо болоходоо, нэгэ ажалда удаан хүдэлдэггүй, хүнүүдтэй үгэеэ ойлгосолдодоггүй хүн болодог.
Цыремжит Батоевагай суглуулбариhаа.
