Ноябрь hарые гахай hара гэдэг. Энэ hарын 14-дэ үбэлтэй уулзалга болоод, энэ үдэрhөө мал үүсэлхэ саг ерэнэ. Һүниндөө хүйтэн, үдэрэй утань хорожол байха. Хэрбэеэ саhанай багаар ороо hаань, газарай хүрьhэн ехээр хүрэдэг, гантадаг.
Энэ hарада гуран (эрэ боро гүрөөhэн) эбэрээ хаяжа эхилдэг. Магад, тиимэhээ, эрдэмтэн Доржи Банзаровай тайлбаряар, ноябриие буряадууд гуран hара гэдэг байгаа. Тэрэ эбэрынь март соо шэнээр ургаха.
Тугалай эхэеэ хүхэхэнь октябрь һара болотор үргэлжэлдэг. Хюруугай унажа эхилхэдэ, үнеэн һүеэ татадаг, тугалаа хүхүүлхэ дурагүй болоходонь, шэргээхээр болодог. Зарим үнеэд һаалгажал байха, зүгөөр боод болоһон ябана. Тиимэһээ энэ үеэр үнеэдээ шэргээжэ, бэеынь тамир хүшэ алдахуулаагүй һаа дээрэ гэжэ тоологдодог. Үнеэгээ шэргээхэдээ, үдэшэ һаагаад лэ, бэшэ һаахагүй гэгшэ һэн. Иигэжэ шэргээхэдэ, үнеэн үдэр түрэхэ. Хэрбэеэ үглөөгүүр һүүлшынхеэ һаагаад шэргээжэрхёо һаа, һүни түрэхэ. Һүни түрэхэдөө, ажалтай, тугалынь хүлдэжэ болохо гэдэг.
Ноябриин 22-hоо сагай уларил бүри хүйтэрхэ. Ойн жэжэ амитад эдеэ хоолоор хомордохо. Үбэл дүүрэн эрхэеэ абадаг гээшэ.
Ноябриин хорёодоор буряад зон үүсэеэ хэжэ эхилдэг. Үүсэ хэхэ малаа тордиhодожо ажаллаад, эртээнhээ бэлдэдэг юм.
Цыремжит Батоевагай суглуулбариhаа.
