… Багшымнай hургаал заабаринь
Бага гэшэгʏй гʏнзэгы лэ,
Наhан соогоошье зальбаран
Найдажа дурсан ябахаар лэ.
(Арсалан Жамбалон)
2023 он – Багшын болон hурган хʏмʏʏжуулэгшын жэл гээд соносхогдоhон гээшэ. Энэ жэлдэ зорюулhан номой ʏзэсхэлэн Цыбен Жамцараногой нэрэмжэтэ Агын номой сангай хизаар ороноо шэнжэлэлгын таhагта зохеогдонхой.
Энэ номой ʏзэсхэлэн хадаа гурбан бʏлэгhоо бʏридэнэ.
«Багшанарай тʏрʏʏшын багшанар» гэhэн нэрэтэй нэгэдэхи бʏлэгтэ тʏрʏʏшын буряад гэгээрʏʏлэгшэд-багшанар тухай номууд табигданхай. Тэдэнэй тоодо – Агын тʏрʏʏшын багша Убаши-Цыбик Онгодов болон мэдээжэ гэгээрʏʏлэгшэд Цыбен Жамцарано, Базар Барадин, Буда Рабданов, Петр Бадмаев гэхэ мэтэ болонод. Бидэ эдэ зоноороо ехэ омогорходогбди.
«Ажал хэрэгтээ абьяас бэлигтэйшʏʏл» гэhэн хоердохи бʏлэгтэ hургуулиин багшанарhаа гадна, хʏдөө ажахын, эмнэлгын, соелой болон тамирайшье — ажахын элдэб hалбаринуудта хʏдэлhэн hурган хʏмʏʏжʏʏлэгшэд, зоноо хʏтэлжэ ябаhан зол хубитай хʏнʏʏд тухай номууд дэлгээгээтэй. Суута бэрхэ хʏтэлбэрилэгшэ Намсарай Линхобоев, механизатор Галина Стафеева, малшан Бальжима Доржиева, Агын тʏрʏʏшын нюдэнэй аргашан Цыпелма Цыбенова, габьяата хʏгжэмшэд Дашицырен Жамбалов, Дагба Ринчинов, буряад барилдаанай эхи табигша Цыден Бадмаев, hур харбалгын hоригшо Мунко-Бадра Дашицыренов, шатараар оло дахин чемпион ябаhан Дашинима Дабаев, уран зураашан Дашинима Дугаров гэхэ мэтэ Агымнай тʏрʏʏ зон залуу ʏетэниие hурган хʏмʏʏжʏʏлэгшэд болоо ха юм. Тэдээн тухайгаа уншагшаднай эндэ табигдаhан номууд сооhоо мэдэхэ, hонирхохо, уншаха аргатай байха.
«Багшаяа дурсанабди» гэжэ гурбадахи бʏлэг соо дээрэ нэрлэгдэгшэ аха захатанай гаталhан ута зам, баян ба hонин намтартай ажабайдал тухай дурсалганууд зорюулагдана.
Yзэсхэлэндэмнай мʏн лэ тойрогой hургуулинуудай ойн баярта зорюулагдаhан номуудтай танилсахаар.
Хʏндэтэ уншагшад! Манай номой сан ерэжэ, хизаар ороноо шэнжэлэлгын таhагта зохеожо табиhан энэ номой ʏзэсхэлэнтэй танилсахыетнай уринабди!
Бальжима Жамсоева,
Цыбен Жамцараногой нэрэмжэтэ номой сангай
хизаар ороноо шэнжэлэлгын таhагые даагша
