Мүнөөдэр жэлэй, үбэлэй hарын адаг үдэр – бүтүү үдэр гээд тоологдодог. Энэ үдэр бурханаа дэлгээхэ, хүндэлхэ үдэр юм. Бурханда табигдаха тахилнууд тухай тодо
Бурханда 7 тахил табигдадаг. Тахил бүхэнэй дунда нэгэ ороhонhоо ехэ бэшэ зайтай байха еhотой. Тахилнуудаа hайса аршаад, зүүн гарhаа эхилжэ, 2 тахилнуудые уhаар дүүргэхэ хэрэгтэй. Энээн соо бурхан багша хүл гараа угааха гэhэн удхатай. Удаань зүүн гарhаа гурбадахи тахил соогоо орооhо, хүрпөө хээд, сэсэг зоожорхидог. Амиды сэсэг hаа hайн, зарим сагта хуйха сэсэг зооходо алдуу болодоггүй. Дүрбэдэхи тахилайнгаа оеорто баhал орооhо хээд, тэрээн руугаа гонзогор хүжэ зоожо носоохо. Иигэжэ бурхан арюудхагдана гэhэн удхатай. Табадахи тахил – наhата. Зулаяа бэлдэжэ бадарааха. Зулаа бадараагаа үды үедөө, наhатаяа уруунь харуулаад байха хэрэгтэй. Удаадахи зургаадахи тахилда баhал уhа хэхэ. Эндэhээ бурхан ундалха. Эгээл баруун талын долоодохи тахилда эдеэ хоолой зүйл гү, али балин хэгдэнэ.
Угааха уhан
Энэ уhа бурхандаа табихадаа, бүхы дэлхэйн гол горхон, мүрэн далайн уhа үргэнэб гэжэ сэдьхэхэ хэрэгтэй. Тиихэдэ бүхы ухаан бодол сэбэрлэн арюудхагдана гэhэн удхатай. Гэхэ зуура тахилда аяглагдаhан уhан дунда бэшэ, халима бэшэ байха зэргэтэй.
Сэсэг
Сэсэг бурхандаа табихадаа бүхы дэлхэйн үнгэ бүриин, газар бүхэндэ ургадаг сэсэг табинаб гэжэ сэдьхэхэ хэрэгтэй. Тахилдаа дунда болотор орооhо хээд, дээрэнь сэсэгээ табиха.
Адис, хүжэ . Бүхы дэлхэйн хангал бүриин сэсэгүүдые бурхадтаа баринаб гээд сэдьхэн табиха хэрэгтэй. Тахилдаа мүн лэ орооhо хээд, хоер гонзогор хүжэ зоохо. Эдэ хүжэнүүд ууюулхын түлөө бэшэ, харин хангалай түлөө табигдана.
Зула
Зула бадараахадаа нара hарын, одо мүшэд ба сэнтэй шулуунай гэрэл табинаб гэжэ сэдьхэхэ.
Ууха уhан
Буддын шажанда уhан 8 шэдитэй юм: hэрюун, амтатай, хүнгэн, зөөлэн, сэбэр, арюун, хотодо хүндэ бэшэ, хоолой сэбэрлэхэ. Тиимэhээ бурхандаа табихада булагай уhан тон hайнаар таараха байна. Харин булагай уhанай олдохогүй hаань, табигдажа байhан уhан дээрэ нэрлэгдэhэн 8 эди шэдитэй гэжэ сэдьхэн табиха хэрэгтэй.
Эдеэ хоол
Дэлхэй дээрэ байгаа эгээл амтатай эдеэ хоол табинаб гэжэ сэдьхэхэ. Тахил соогоо орооhо хээд дээрэнь эдеэнэй зуйл: шэхэр, боово угы гэбэл жэмэс табиха.
Бурхандаа тахилнуудые табихадаа гурба дахин «Ом Аа Хум» гэhэн тарни уншаха.
Цыбен Жамцараногой нэрэмжэтэ Агын хизаарай номой санай
мэдээсэлэй таhагай мэргэжэлтэн Дамдинжапова С.Б.
