Танай анхаралда «hолонго» гэhэн эдир багашуулда зорюулhан гурбан хубиhаа зохеогдожо гараhан ном. Энэ hая үнгэргэгдэhэн Бүгэдэ буряадай «Алтаргана» нааданай номуудай мүрысөөндэ энэ ном илажа гараhан байна. Буряад Уласай Болбосоролой болон эрдэм ухаанай яаманаар зүбшөөгдэжэ, Улаан-Удэ хотодо «Бэлиг» гэжэ хэблэлдэ 2018 ондо хэблэгдэhэн байна.
Авторнууд-согсолборилогшод гэхэдэ, багшын ажалай ветеран Дулмацырен Кишиктуевна Бадмаева, Любовь Дарицыреновна Дондокова, Гэрэлтэ Батомункуевна Цырендашиева, Валентина Бальжинимаевна Черникова болонот. Энээхэн уншалгын ном классhаа гадуур уншаха ном. Хүүгэдэйнгээ түрэл буряад хэлэн дээрээ уншажа hурахыень, уншаhанаа ойлгохыень, түрэл хэлэеэ шудалхадань ехэ хэрэгтэй, туhатай байха номууд гэжэ найдагдана.
Жамсоева Б.Д.,
нютаг ороноо шэнжэлэлгын таhагые даагша
