Үхэрэй мяханай боро шүлэн дом арга гэжэ мэдэдэг гээшэбди.
Һая түрэһэн нарай бэетэй эхэнэр зондо нэн түрүүн боро шүлэ шанажа үгэдэг.
Мүнөө сагта тараһан ковид үбшэндэ эмгэгтэһэн, хии хөөрэһэн, шадалгүй һуларһан бэетэй, удаан саг соо үбшэ хабшанда нэрбэгдэһэн, бэе махабадай тэнхээгүй болоһон зондо зүбөөр боро шүлэ шанажа хооллуулаа һаа, тамир тэнхээ ородог юм.
Үхэрэй хаын – адхаалай, далын, гуяын – можын, шагайтын зөөлэхэн хара мяха урдань тэбшэхэн соо хээд, хоёр гараараа хутагын үзүүрнүүдые урда урдаһаань харуулжа баряад, жэжэ болотор татадаг һэн. Татаһан мяхаяа хүйтэн уһанда хэжэ нюхаад, гал дээрэ табихадаа, хажуудань сособой худхахадажа байхада, мяхан аалихан буурабшалагдажа хөөһэтэн, мяхан соохи һайн, туһатай бодосууд хүрибтэр боложо хөөрэхэдэнь, шүлэнэй шанагаар һамаржал байха. Арьялтар бусалгажа огто болохогүй: татаһан мяхан тэрэ дороол болошохо, дабһалаад, халууханаар, уурал гараһаар байтарнь шэмэжэ уухада, бэедэ үл үгэжэ, дулаасуулжа, арга болодог юм.
Яаран тээрэнгүй, аргааханаар хүлэртэрөө уугаад, бэедэ һайнаар шэнгэхыень гэртээ һууха гү, али хэбтэхэ хэрэгтэй, даараха, жэхыхэгүй юм.
Боро шүлэ шанахада, хатуу хүдүү, хальһатай мяхан таарамжагүй байха аабза. Һонгино, чеснок гү, али перец хэхэгүй гэхэ.
Зөөлэхэнөөр хатаһан борсо нюдэжэ бутаргаад, боро шүлэ шанагша һэн. Амтатайл шүлэн болодог даа.
Цыремжит Батоевагай суглуулбариhаа.
