Январиин 27-hоо февралиин 4 болотор – удаадахи 9 хүйтэн.
Григориан литээр февраль hара гараа. Февраль hарые Сагаан hара гэнэбди. Буряад литээр — бар hара, үдэрнүүд утахан болобо гэжэ эли болодог. Хүйтэхэншье hаа, игаабаритай боложо эхилнэ. Табан хүйтэнүүдэй адаг.
Табиhан түүхэй таряан хүлдэхэгүй.
Үбэлэй хүйтэниие дабажа гарадаг ургамалнууд байдаг, ажамидаралай илалтын hүлдэ болодог. Хүйтэнэй буураашьедүй hаань, хүүгэдэй сана, конькигаар ябахаар таарамжатай саг.
Февралиин 4-hөө 13 болотор – удаадахи 9 хүйтэн.
Игаабари үдэрнүүдэй сагаараа нэмэжэл байхада, зүргэ харгын саhан эреэлэн хайлаад, хара газар харагдажа эхилдэг.
Байгаали гүнзэгы нойрhоо hэрижэ эхилдэг. Хүйтэнүүд буурантаашье hаа, шуургалжа болохо. Түрүүшын тугалнууд гаража, сагаан эдеэнэй эхин hара ерэнэ.
Урдын зоной хэлэдэг ёhоор, Сагаан hарада – Сагаалганда үүсын мяханай хахадынь үлэhэн байгаа hаа, үбэлжэлгэ hайн үнгэргэгдэхэ. Сагаалганhаа шэнэ жэлээ тоолодог гээшэ. Буряад зоной хэлсэдэг, ажагладаг байhанай ёhоор, Сагаан hарын тохёолгон сагай уларил уридшалан мэдэхэ хэрэгтэ тон ехэ удхатай юм. Хэрбэеэ сагhаа урид тохёогоо hаань, унжагар ута хабар боложо, нэгэ хүйтэрхэ, нэгэ дулаарха – таагүй уларил байха. Одо мүшэдые, Һара, Нара адаглан шэнжэжэ, сагай уларилай хубилалтануудые уридшалан мэдэдэг элинсэгүүднай хүн зоной ажаhуудалда тон ехэ туhа манай үеынхид хүрэтэр хүргэнэл даа. Адууhа мал ажалладаг зондо дулаанай саг февраль соо наашалжа, хүн, мал – бултал тэниидэг гээшэ.
Февралиин 14-hөө 22 болотор – удаадахи 9 хүйтэн.
Добо эреэлхэ.
Февралиин 15 (Сретение) – 81 хүйтэнэй үе үнгэржэ, ехэ уринай амин орохо, шаргын хахинаан барагдажа, шара тэхын бабанаан эхилхэ юм ха. Энэ үдэр үбэл хабартай уулзадаг гэхэ. Удаань, апрелиин 15-ай хирэ болотор 60 хоногой жабар ба майн 25 болотор 40 hэрюун үглөөнүүд үргэлжэлдэг. Христос литын ёhоор шуурганууд болодог. Энэ сагта буруунууд булшантай байжа, үбэлые дабажа байhанаа мэдэрдэг. Тангаршаалдаха дуратай бэлшээридэ гараха.
Энэ үдэр ямар уларил байнаб, тиимэл хабар болохо. Хэрбэеэ нял шал гэдэжэ байгаа hаань, нойто ехэтэй, хүйтэн хабар болохо, саhан ороо hаа, хабарай урин дулаан орой эхилхэ. Огторгойдо олон ялагар одо мүшэд, нэгэшье үүлэгүй hаа, удаахан дулаархагүй.
Цыремжит БАТОЕВАГАЙ суглуулбариhаа.
