Мүнөөдэр, декабриин 9-дэ, Эсэгэ ороной Баатарнуудай үдэртэ зорюулагдаhан хэмжээ ябуулганууд хаа-хаанагүй, нютаг бүхэндэ эмхидхэгдэнэ.
Ц.Жамцараногой нэрэмжэтэ номой сангай мэргэжэлтэд хэдэн хэмжээ ябуулгануудые эртээнhээ түсэблэжэ, уридшалан, Баатарнуудай үдэр угтуулан үнгэргөө юм.
«Герои среди нас» гэhэн уран зохеолой-түүхэтэ часта хабаадаhан ахалагша ангиин hурагшад нютагайнгаа Баатарнууд тухай мэдээсэл абахаhаа гадна гүрэн түрынгөө дээдын шагналнуудтай танилсаа, видео-клипүүдые хараа, патриотическа дуунуудые болон Роберт Рождественскиин суута «Реквием» шагнаа.
Ургажа ябаа улаан бургааhахадаа – балшархан үхибүүдые багаhаань Эхэ орондоо дуратайгаар, үнэн сэхээр ундылгэхэнь шухала. Эгээл иимэ зорилготойгоор «Героев помним имена» гэhэн номуудтай танилсуулгын үзэсхэлэн эмхидхэгдэhэн байна.
Олоной ами наhа абарhан сэрэгшэдэй гү, али үдэр hүнигүй габшагайгаар ажаллагшадай баатаршалга мэндэ ябагшад хододоол дурсан байха. Иимэ дурасхаал болгон, хизаар ороноо шэнжэлэлгээр, түүхээр hонирходог уншагшадта «Подвиги, которые нельзя забыть. Герои Забайкальского края» гэhэн номой-зурагуудай үзэсхэлэн дэлгээгдээ бшуу.
Мүнөөшье дэлхэй дээрэ дайшалхы байлдаанууд боложол байна. Украинада сэрэгэй тусхай операциин эхилhээр, олон нютаг хүбүүднай дайшалхы габьяа харуулнал. Энээхэн темэ хэмжээ ябуулгануудта элихэнээр харагдана. Эндэ hая Москвада нээгдэhэн, Оросой Уласай Баатарнуудта — сэрэгэй тусхай операцида хабаадагшадта зорюулагдаhан «Герои и подвиги» гэhэн фото-үзэсхэлэн тухай хэлэгдээ. Тэндэ, Гоголиин бульвар дээрэ 33 сэрэгшэдэй дүрэ-зурагуудтай болон дайшалхы габьяагайнь түүхэнүүдтэй стенднүуд тодхогдоо. Үзэсхэлэнэй эгээл эхиндэ манай нютаг хүбүүн – Балдан Цыдыпов тухай стенд табяатай.
Балдан Цыдыповэй баатаршалга — сэрэгэй тусхай операцида хабаадажа байhан бүхы сэрэгшэдэй дайшалхы габьяагай жэшээ мүн. Түүхын үе саг бүхэн өөр өөрын баатарнуудтай — эрэлхэг зоригтойгоор Эсэгэ ороноо хамгаалагшадтай байдаг ха юм. Иимэл баатарнуудтай байхадаа, гүрэн түрымнай найдамтай ерээдүйтэй байхань лабтай.
Дарима Базарова,
Ц. Жамцараногой нэр. Агын хизаарай номой сангай
мэдээсэлэй таhагай ахамад библиотекарь
