Алда сэнхир хадагаа барижа,
Алтан дэлхэйдэ сэржэмээ үргэе!
Үбгэн буурал аба эжыгээ хүндэлжэ,
Үглөөнэй элшэ наранаар золгоё!
Буряад зоной ехэ удха шанартай Шэнэ жэлэй hайндэр хадаа Сагаалган болоно. Хүн бүхэн Сагаалганаар нэгэ наhа нэмэдэг гээшэ. Сагаалганиие гүн сагаан сэдьхэлhээ, сагаан эдеэгээр хүндэлжэ угтадаг гурим бии.
«Сагаалган – праздник наших предков» гэhэн нэрэтэй, Сагаалганиие яажа угтахаб гэжэ тайлбарилhан буклет Ц. Жамцараногой нэрэмжэтэ номой сангай хүүгэдэй таhагай мэргэжэлтэд зохёобо. «Мэдэжэ ябабал, бултанда буян» гэжэ номhоо букледэй гол hанамжанууд абтаа.
Сагаан hарада эртээнhээ бэлдэжэ эхилхэнь шухала: намар үүсэ хэхэдээ, Сагаалганай мяха аминдань болгожо хадагалдаг, Сагаалганай урда тээ хото хорёогоо, гэр байраяа сэбэрлэдэг, дасан ошожо, зурхай зуруулдаг, уншалгануудта нэрээ оруулдаг гэхэ мэтэ заншалнууд тоологдоно. Бүтүү үдэрэй, hарын шэнын нэгэнэй ёhо заншалнууд болон яагаад золгохо, шэнын нэгэнэй үдэр юу сээрлэхэ тухай бэшэгдэнэ.
А. Дондокова,
Ц. Жамцараногой нэрэмжэтэ номой сангай хүүгэдэй таhагые даагша