Хүндэтэ уншагшад! Танай анхаралда шэнэ нэрэ — Галина Цыдыпова гэжэ үргэн hайхан Зүдхэли нютагай уран шүлэгшын «Зүүдэндэм ерэдэг Зүдхэлимни» гэhэн номтой танилсуулхамнай.
Галина Дашидондоковна Цыдыпова 1958 ондо Оловяннын районай Долгокыча гэжэ hууринда түрэhэн намтартай. 1965 ондо эжы абань Зүдхэли зөөжэ ерээд нютагжаhан байна. Бага балшар наhандаа элдэб юумэ үзөөшьеhаа, 2001 онhоо Галина Дашидондоковнагай хуби заяан ондоогоор эрьелдэжэ, ажалайнгаа амжалтаар суурхаhан байна. Дамдинов Мижитдоржи нүхэртэеэ хонишоной бэлэн бэшэ ажалда үсэд нэтэрүүгээр хүдэлөө. 2007 ондо Баяр Баясхаланович Жамсуевай хүтэлбэри доро, түрүүлэгшэ Дарима Михайловнагай ба зоотехник Мижитдоржи Дамдинжаповай ударидалгаар Агын үүлтэрэй хонидые селекционировани хэжэ суурхаhан байна. «Агинская» гэжэ нэрэтэй хонидые анха түрүүн бии болгоhон габьяатай.
Хонин ажал хэхынь хажуугаар, элдэб янзын хубсаhа оехо, шүлэг бэшэхэ дуратай хүн. 2013 ондо наhанайнгаа амаралтада гаранхай, ажалай ветеран.
Галина Цыдыповагай түрүүшын шүлэгэй суглуулбари «Хонишоной дэбтэрhээ» гэжэ 2018 ондо хэблэгдэhэн. «Зүүдэндэм ерэдэг Зүдхэлимни» — уран шүлэгшэнэй хоердохи ном болоно. Энэ ном соогоо эхэ байгалидаа, амитан, ан гүрөөл, шубуу шонхорто ехэ дуратайгаа харуулна. Олон шүлэг соогоо эжы аба, тоонто,бууса тухай бэшэнэ. Ухаан бодол, hайхан сэдьхэл шүлэгүүд соогоо харуулна.
«ЗYYДЭНДЭМ ЕРЭДЭГ ЗYДХЭЛИМНИ»
Балшархан наhандам угтажа абаhан
Баянхан нютаг Зүдхэлимни,
Баяраар, жаргалаар халяадаг лэ,
Бахархал омогорхол асардаг лэ.
Зугаалжа үндыhэн басагадни
Зургаахан наhанайм үетэн лэ,
Зүүдэндэм ерэдэг Зүдхэлимни
Залуугайм hайхан нютаг лэ.
Хонидоо адуулhан хадануудни
Холшорхон наhыем hануулдаг лэ,
Хамтадаа үндыhэн үетэмни
Хамагхан наhанайм баялиг лэ.
Цырендашиева Э.Д.,
хизаар ороноо шэнжэлэлгын ба библиографиин номой сангай ажалшан
