Ганга мүрэн далайе
Газараарш хаажа болохогүй,
Габжа* ехэ ламые
Галхаан** хэлэжэ болохогүй.
Эрье мүрэн далайе
Элhээрш хаажа болохогүй,
Эмшэн ехэ ламые
Элдэбээрш хэлэжэ болохогүй.
Уhан ехэ далайе
Уулаарш хаажа болохогүй,
Убдистай*** ехэ ламые
Омоглонш хэлэжэ болохогүй.
Сэлгеэн мүрэн далайе
Шэлээрш хаажа болохогүй,
Шэрээтэ ехэ ламые
Шэблэжэш** хэлэжэ болохогүй.
Габжа* – санаартанай нэрэ зэргэ
Галхаажа, шэблэжэ** – элдэб үгөөр хэлэжэ (нүгэл)
Убдистай*** – ехэ эрдэмтэй лама
ХХХ
Дэлэстыем сахилуулhан
Дэлхэй яагаа гоё гээшэб,
Дээхэнүүр түрэл олгуулhан
Диваажан яагаа гоё гээшэб.
Самбайтайем сахилуулhан
Сагынь яагаа гоё гээшэб,
Саахануур түрэл олгуулhан
Сахюусан яагаа гоё гээшэб.
Унагшыем сахилуулhан
Үргэнхэн дэлхэйн гоё гээшэнь,
Үлэмжэ түрэл олгуулhан
Улаанхан Абидын гоё гээшэнь.
ХХХ
Сэлгеэн мүрэнэй захада
Шэнэhэн яагаад гандахань даа,
Шэгэмүүниин дэргэ(н)дэ
Шэбэл* яагаад болохонь даа.
Ангар далайн захада
Алирhан яагаад гандахань даа,
Арьяа Баалын дэргэдэ
Ада** яагаад болохонь даа.
Харахан далайн захада
Хайлааhан яагаад гандахань даа,
Хагаан бурханай дэргэ(н)дэ
Хамшаг яагаад халдахань даа.
Шэбэл* — нүгэл
Ада** — муу юумэн
Эдэ дуунуудые Могойтын Сэбэгэй Дэжэд дуулажа үгэhэн.
Багшын ажалай ветеран
Цыремжит БАТОЕВАГАЙ суглуулбариhаа.
