2022 оной апрель-май hарада Цыбен Жамцараногой номой сангай уншалгын таhагай мэргэжэлтэд «Толоной абдарhаа» (Бүгэдэ буряадай «Толон» газетэ суг уншаябди) гэhэн хизаарай акци эмхидхэжэ үнгэргэhэн байна. Тус акцида бүхыдөө 60 хүн хизаарай элдэб hууринуудhаа эдэбхитэйгээр хабаадаа. Мүнөө хадаа буряад хэлэ бэшэг шудалалгада ехэ анхарал хандуулмаар саг тогтоод байна. Тиимэhээ буряад хэлэеэ, ёhо заншалаа, түүхэ соёлоо хүгжөөхэ зорилготойгоор энэ акци эмхидхэгдэhэн байна гээд тэмдэглэлтэй.
Буряад хэлэндэ, уран зохёолдо hурагшадай дурлал татаха гээшэ буряад хэлэнэй багшанарай ба гэртэхинэй шухала зорилго болоод байна ха юм. Тиимэһээ бидэ, номой сангай ажалтад, сурбалжалагшадшье ажалдаа элдэб түхэлэй хүдэлмэри, һонирхолтой хэрэгсэлнүүдые, үзүүлбэринүүдые, шэнэ онол аргануудые хэрэглэжэ, үхибүүдые түрэл хэлэндээ дуратай болгохо гэжэ оролдонобди. «Толоной абдарhаа» гэhэн хизаарай акци ехэ үрэжэлтэйгөөр үнгэрөө гэжэ тэмдэглэлтэй. Хабаадагшын диплом хүн бүхэндэ бэлдэжэ, сайтдаа оруулhан байнабди. Хүнхэрэй болон Зугаалайн дунда hургуулинуудта 1-дэхи ангиин hурагшад – эгээ эдир хабаадагшад Бато Цыденов болон Баярто Пурбуев, үхибүүдые буряад хэлэндэ hургадаг, «Толон» hонинтой танилсуулдаг Таптаанайн «Солнышко» хүүгэдэй сэсэрлигэй хүмүүжүүлэгшэ Мария Ванчикова, эгээ наhатай хабаадагша -76 наhатай Адуун- Шулуунай Буда Галсанова, Акшаагай аймагай Хүрэлжэ нютагай захиргаанай толгойлогшо Надежда Жаргалова оролдожо, эрхимээр хабаадаа. Эдэ хабаадагшадые түрэл хэлэеэ дэмжэхэ, буряадаараа уншаха эрмэлзэлтэй байhанайнь түлөө Бүгэдэ буряадай «Толон» газетын редакци бултандань баярые хүргөөд газетын зүгhөө эдэбхитэй хабаадаhанай, түрэл хэлэеэ дэмжэхэ, буряадаараа уншаха эрмэлзэлтэй байhанайнь түлөө Баярай үгэ, өөhэдынгөө хэблүүлhэн «Толоной абдарhаа» (hолонго) гэhэн ном бэлэг үгтөө.
Уншалгын таhагые даагша
Цыцыгма Цыриторова
