Мүнөөдэр, октябриин 20-до Цыбен Жамцараногой нэрэмжэтэ Агын хизаарай номой сангай дэргэдэ буряад арадай үндэhэн наадануудай нэгэн болохо «Шагай надаанай» нээмэл түхэлэй хубиин мүрысөөн боложо үнгэрөө. Энэ турнир «Бэлиг» гэhэн түрэл буряад хэлэн дээрэ харилсалгын булангай шугамаар, мүн тиихэдэ Агын Буряадай тойрог дотор ябажа байгаа буряад хэлэнэй фестивалиин шугамаар үнгэргэгдэнэ.
Цыбен Жамцараногой нэрэмжэтэ Агын хизаарай номой сангай дэргэдэ байгуулагдаhан «Агын номой сангуудай бүлгэм» гэhэн ниитэ эмхи мүнөө жэлэй апрель hарада Үбэр Байгалай хизаарай соелой яаманай соносхоhон мүрысөөнэй мүнгэн туhаламжада хүртэжэ, ууган хэлэн дээрээ үхибүудые харилсуулжа hургаха тусхай булан түхеэрhэн байна. Тиин энэ удаа мүрысөөн «Бэлиг» булангай ябуулжа байгаа хэмжээнүүдэй нэгэн болоно гээд тэмдэглэлтэй.
Тус турнир «Шагай наадан» гэhэн буряадай үндэhэн наада эдиршүүлэй дунда дэлгэрүүлхэ, буряадайнгаа үндэhэн соел, урлал, хэлэ, еhо заншал hэргээхэ, зандан байлгаха, үшөө саашань улам дэлгэрүүлхэ, эгээл мэргэн наадагшые элирүүлхэ зорилготойгоор үнгэргэгдэжэ байна.
Мүнөөдэрэй мүрысөөндэ буряадайнгаа соел, еhо заншал, «Шагай наадан» гэhэн буряадай үндэhэн нааданда дуратайшуул 80 хабаадагшад сугларба. Зуугаад модо гаталжа, энэ мүрысөөндэмнай хабаадахаяа Агын тойрогой тосхон, хүдөө нютагуудhаа зорин ерээ. Дулдаргын аймагай Дулдарга ба Зүдхэли нютагуудhаа, Могойтын аймагhаа Могойто тосхон ба Сагаан-Уула нютагhаа, Агын аймагай Урда-Ага, Амидхааша нютагуудhаа, Ага тосхоной 1-дэхи, 2-дохи, 3-дахи дунда hургуулингуудай hурагшад, «Үльгэр», «Звездочка», «Солнышко» сэсэрлигүүдэй эдиршүүл энэ мүрысөө шэмэглэбэ.
6-8 наhатай хабаадагшад «Мори урилдаан» гэжэ хубида урилдаа, 9-11-тэй хүүгэд «Няhалалгада» мүрысэбэ.
Мүрысөөнэй дүнгүүдээр «Мори урилдаан» гэhэн хубида Могойтын 2-дохи дунда hургуулиин hурагша Дондоков Тимур түрүүшын hуури эзэлээ, хоердохи hуурида Агын 2-дохи дунда hургуулиин hурагша Тогодоева Сойжина, харин гурбадахида Могойтын 3-дахи дунда hургуулиин түлөөлэгшэ Цыбенова Номин гараа.
«Шагай наадан» гэhэн нээмэл мүрысөөнэй «Няhалалга» гэhэн хубида Дулдаргын Шоенова Алина нэгэдэхи болоо. Хоердохи hуурида Сагаан-Уулын Цыренжапов Баярта, гурбадахида Могойтын Кукшинова Доржи гараа.
Энэ мүрысөөнэймнай ахамад судья, Иосиф Кобзоной нэрэмжэтэ Үхибүүдэй уран урлалай байшангай мэргэжэлтэн Булат Балданович Дамбаев «Шагай нааданай» дүримүүдтэй хабаадагшадые танилсуулжа, бүхыдөө нааданай ябаса гурим соонь үнгэргөө.
Манай номой сангай дэргэдэ анха түрүүшынхиеэ эмхидхэгдэhэн «Шагай нааданай» тойрогой хэмжээнэй урилдаан үндэр хэмжээндэ үнгэрөө. Элинсэгэймнай хэр угhаа дамжан ябажа байгаа, шагай наадан эдиршүүлэй дунда эдэбхитэй ябуулагдана гэжэ адаглахаар байба.
С.Б. Дамдинжапова,
Цыбен Жамцараногой нэрэмжэтэ Агын хизаарай номой сангай
мэдээсэлэй таhагай ахамад мэргэжэлтэн
