2021 ондо соносхогдоhон «Читаем бурятскую классику вместе» гэhэн акциин үргэлжэлынь «Читаем бурятскую классику-вместе. Дети» эхилхэнь. Энэ акцида Забайкалиин хизаарай аймагуудаар, хүдөө нютагуудаар, хото городуудаар ажаhуудаг 6-hаа 17 наhатай болотор үхибүүд хабаадаха аргатай.

Бүхыдөө акци дүрбэн шатаhаа бүридэхэ. Түрүүшын шата уран зохёологшо Цырен-Базар Бадмаевич Бадмаевта зорюлагдана. Энэ шата февраль-март hарануудта үнгэргэгдэхэ.

Ц.-Б. Бадмаев 1928 ондо Могойтын аймагай Сагаан-Шулуутай нютагта түрэhэн. Зугаалайн дунда hургуули дүргээд, Агын багшанарай училищиин hүүлээр Улаан-Үдэ хотын Доржо Банзаровай нэрэмжэтэ багшын институдта hуража байхадаа, түрүүшын шүлэгүүдээ «Буряад – Монголой үнэн» газетэдэ бэшэдэг болоо. Талаан бэлигтэй залуу хүбүүн Москва хотын М. Горькиин нэрэмжэтэ Литературна институт мэргэжэлээ дээшэлүүлхээ эльгээдэhэн намтартай.

Цырен-Базар Бадмаев олон тоото шүлэгүүдые, поэмэнүүдые, рассказуудые, киносценаринуудые, оршуулгануудые бүтэгээ. Олон дуунуудай үгын автор юм. Тэрэнэй гуша гаран номууд Шэтэ, Улаан-Үдэ, Эрхүү, Москва хотонуудта хэблэгдэн гараhан.

Поэдэй үргэн ехэ бодолнуудые сэдьхэжэ бэшэхэдэнь, гүнзэгы удхатай, олоной сэдьхэл хүдэлгэмэ, уран үгэнь ехэ хүсэтэй, зондо туhатай зохёолнууд болоно. Үхибүүдтэ зорюулагдаhан номуудынь буряад болон ород хэлэн дээрэ олоор хэблэгдэнхэй.

«Хурдан мори унаад, нюдэнhээ уhа гаратараа гүйлгэжэ үзээ hэн гүт? Даха шэнги даглагар зузаан хониной нооhо хайшалжа туршаа hэн гүт? Сэгээн номин талада жэргэмэлэй шэнхинэсэ жэргэхые дуулаа hэн гүт?» Иигэжэ Цырен-Базар Бадмаев «Будамшуугай орон нютагаар Серёжын аяншалhан тухай» гэhэн туужадаа үхибүүдтэ хандан эхилнэ.

Цырен-Базар Бадмаевай «Эхин үльгэр түүхэнүүд эхын уураг hүндэл юм даа…» хэжэ шүлэгэйнь хэhэгтэй танилсагты:

Энхэ арадайм аман үгэ

Тэжээн бодхоhон эхын hүн

Эхын лэ hүн даа, дамжаггүй.

Тэрэнэй шуhанда ябахань мүн.

Харин хүбүүн ехэ болоод,

Өөдөө, дабаа гаталхаяа

Хүхөө хүхэжэ ябадаггүй.

Өөрөө гарадаг сэсэн хүн.

Үхибүүд! Манай акцида эдэбхитэйгээр хабаадалсыт гэжэ уринабди.