Гал гуламтатай, гэртэй холбоотой сээр

Гал гуламтатай, гэртэй холбоотой сээр:

— гал гуламтаяа хүндэлжэ, эдеэнэй дээжэ, тоhо, хүжэ үргэжэ, гэрэйнгээ галай эзэниие баярлуулжа ябахада үлзытэй;

— галда хутага дүтэлүүлхэеэ сээрлэхэ — галай заяаша сухалдаха;

— галай хабшаг холуур табиха, үлгэхэ;

— гал дээрэ уhа адхахагүй, гал уhаар унтараахагүй – гал уhан хоёр бэе бэедээ харша гэжэ мэдэхэ хэрэгтэй;

—  галдаа үргэл үргэхэ үедэ хээлитэй эхэнэр ойро байхагүй – досоохи үридэнь муу нүлөөтэй;

— галаар наадахагүй – үхибүүд hүниндөө шээдэг болохо;

— галай хажууда хэрүүл хэжэ, бэлин шэбшэг хэлэхэгүй – галай аюулда орожо магад;

— галаа худхадаг хабшаг галай үүдэнhээ холо байлгаха, дүтэ байлгаа hаа, буудал буужа болохо гэдэг;

— галай үнэhэ ехээр худхахагүй – гэрэй байдал худхаляатай болохо;

— гэр соохи тахидаг бурханаа тооhондо даруулбал, бурханай садиг (кара) хүрэхэ;

— гэрэй заяаша ариг сэбэртэ, амтатай эдеэнэй үнэртэ дуратай, тиимэһээ муухайгаар, муухай үнэр гаргажа байхагүй;

— хүжэ арса ууюулхадаа, үлеэжэ унтараахагүй;

— гэр соо наншалдажа болохогүй — муу юумэн шэбээлхэ;

— гэр соохи үүдэн ба һугалгануудые, шкафай хабхагуудые hайнаар хааха;

— шала (пол) угаахадаа, норгоһоноо хуурай болотор аршаха, үгы бол архинша нүхэртэй болохо;

— эдеэнэй столой углууда һуубал, ганса бэе ябаха.

— орондоо ороод, дуулахагүй, бархирхагүй — зоболон һалахагүй;

— хутагын эри дээшэнь харуулжа табихагүй – аюултай;

— тогоонһоо хутагаар мяха зоожо абахань ехэ ёротой;

— гэрээ нара буруу тойрохоёо сээрлэхэ;

— үүдэ түшэжэ һуухада ёротой;

— бахана, столб тэбэрихэгүй — баханын зоболондо хүртэхэ;

— ганса модо абаад гэртэ ороходо — гуйраншанай шэнжэ;

— түлхюур эдеэнэй шэрээ дээрэ табихагүй — үгырхые зүгнэхэ;

— абдар, шэрээ дээрэ һуухагүй — үридэ орохо;

— гэрэл (зеркало) дээшэнь харуулаад табихагүй;

— хайша ангайлгаад, табижа болохогүй;

— тогоон соо эдеэнэй халбага орхибол, шүдхэр долёохо, ажал хэрэг бүтэхэгүй;

— «Алтан гэрэл» судар ба «Гэсэр» номтой байхада, муу юумэн (негатив) халдахагүй;

— саарһа дэмы хайшалхагүй — хэрэг хубхай хооһон болохо;

— уншажа байhан номоо hүниин сагта дэлгээгээд орхихогүй – шүдхэр уншажа, ухаан баларха (память ослабнет).

Цыремжит Батоевагай суглуулбариhаа.